05.08.2026

O‘zbekistonda avtolizing yanada hamyonbop bo‘ladi

ADM kompaniyalar guruhi, Hyundai Corporation Singapore va FINCOM lizing kompaniyasi qo‘shma korxonani ishga tushirdi. Mazkur korxonaning 3-avgustda boshlangan birinchi bosqichida loyihaga qariyb $40 mln investitsiya kiritiladi. Hamkorlik ishtirokchilari besh yil ichida $100 mln gacha bo‘lgan investitsiya va lizing portfelini shakllantirish niyatida. Loyiha avtomobillarni xarid qilib olish uchun moliyaviy imkoniyatlarni kengaytiradi va respublika avtomobilsozlik sanoatini rivojlantirishga qo‘shimcha turtki beradi.

Toshkent xalqaro investitsiya forumida imzolangan ushbu hamkorlik O‘zbekiston avtolizing bozoridagi eng yirik loyihalardan biriga aylanadi – u xalqaro moliyaviy ekspertiza, zamonaviy lizing yechimlari va mamlakatning eng yirik avtomobil ekotizimini birlashtiradi.

“Har bir tomon loyihaga o‘z ekspertizasi va resurslarini kiritadi. Hyundai Corporation xalqaro moliyaviy vositalar, global tajriba va korporativ boshqaruvning eng yaxshi amaliyotlaridan foydalanish imkoniyatini ta’minlaydi. FINCOM lizing mahsulotlarini ishlab chiqish, operatsion boshqaruv va mijozlarga xizmat ko‘rsatishni rivojlantirish uchun mas’ul bo‘ladi. ADM O‘zbekistondagi eng yirik avtomobil dilerlik tarmog‘i, ishlab chiqarish va tarqatish quvvatlari, shuningdek, keng mijozlar bazasiga kirish imkonini beradi”, – deydi FINCOM hammuassisi Stanislav Kim.

Hamkorlikning birinchi bosqichida yangi lizing yechimlari O‘zbekistonda ishlab chiqarilgan va ADM dilerlik tarmog‘i orqali sotiladigan Kia avtomobillari uchun amal qiladi. Kelgusida kompaniya ADM tomonidan taqdim etilgan boshqa avtomobil brendlarini (CHERY, HAVAL, TANK, Changan, Hyundai Truck & Bus) o‘z ichiga olgan mahsulotlar turkumini kengaytirishni rejalashtirmoqda. Kompaniya, shuningdek, transport lizingini rivojlantirish, maxsus texnika, tijorat ko‘chmas mulki va korporativ mijozlarni xarid qilish uchun moliyaviy yechimlarni joriy etish niyatida.

Kelishuv ishtirokchilari qo‘shma korxonaning ishga tushirilishi bozorga lizing mahsulotlariga o‘sib borayotgan talabga javob beradigan yanada moslashuvchan va qulay moliyalashtirish mexanizmlarini taklif qilish imkonini berishiga umid qilmoqdalar.

_____________________________________________________________________________

ADM – O‘zbekistondagi eng yirik xolding bo‘lib, yengil va tijorat avtomobillarini distributsiya qilish, mahalliy ishlab chiqarish, sotish, kafolatli va kafolatdan keyingi xizmat ko‘rsatishga ixtisoslashgan. Kompaniyalar guruhi O‘zbekistonda xususiy investitsiyalar hisobiga qurilgan birinchi avtomobil korxonasi – ADM Jizzakh zavodining egasidir. Xolding Kia, CHERY, HAVAL, TANK, Changan, Hyundai Truck & Bus kabi jahon avtomobil brendlari bilan hamkorlik qiladi. ADM dilerlik tarmog‘i butun O‘zbekiston bo‘ylab turli brendlarning 90 dan ortiq rasmiy dilerlik markazlariga ega.

Hyundai Corporation – Janubiy Koreyaning keng tarmoqli yetakchi savdo kompaniyasi bo‘lib, dengiz kemalari, sanoat korxonalari va uskunalari, avtomobillar, po‘lat va kimyoviy mahsulotlardan tortib elektronika va umumiy foydalanish tovarlarigacha bo‘lgan keng turdagi mahsulotlar bilan eksport-import operatsiyalarini amalga oshiradi.

FINCOM O‘zbekistondagi avtomobil sohasida lizing faoliyatini olib boruvchi yetakchi bo‘lib, bitimlar soni bo‘yicha yetakchi beshta lizing kompaniyasi qatoriga kiradi. Kompaniyaning filial tarmog‘i 12 ta bo‘linmani o‘z ichiga oladi. FINCOM – Kia LEASING, CHERY LEASING, HAVAL LEASING va boshqa bir qator dasturlarning asosiy moliyaviy hamkori va tashkilotchisi hisoblanadi.